World

రేసులో దూకాయంటే ఈ పావురాలు ఆహారం కూడా తీసుకోవట !

రేసులో దూకాయంటే ఈ పావురాలు ఆహారం కూడా తీసుకోవట!

+ విశాఖలో పావురాలకు శిక్షణ ఇస్తున్న కుటుంబం
+ విదేశాల్లో ఈ పావురాలకు మంచి డిమాండ్ ఉంది

క్యాపిటల్ వాయిస్, విశాఖ జిల్లా ప్రతినిధి :- విశాఖలో ఓ కుటుంబం పావురాల తో స్నేహం చేస్తోంది. వారసత్వంగా వచ్చిన అలవాటు అలాగే కొనసాగుతోంది. ఈ ఫ్యామిలీ పావురాలకు ప్రత్యేకంగా శిక్షణ ఇస్తోంది. పంజాబ్‌కు చెందిన బుక్కాసింగ్‌ కొన్నేళ్ల కిందట హైదరాబాద్‌లో ఉండేవారు. పావురాలతో ఆయనకు విడదీయరాని బంధం ఏర్పడింది. వాటిని మచ్చిక చేసుకుని శిక్షణ ఇవ్వడం ప్రారంభించారు. బుక్కాసింగ్‌ చెప్పినట్టే పావురాలు నడుచుకునేవి. బుక్కా సింగ్ కుటుంబ సభ్యులు సుమారు 40 ఏళ్ల కిందట బతుకుదెరువు వెతుక్కుంటూ విశాఖకు వలస వచ్చారు. రైల్వే స్టేషన్‌ సమీపంలో ఉండేవారు. పదేళ్ల కిందట ప్రభుత్వం కొమ్మాది సమీపంలోని సేవానగర్‌లో కాలనీ కట్టి పేదలకు ఇళ్లు ఇచ్చింది. వాటిలో బుక్కాసింగ్‌కు కూడా ఓ ఇల్లు దక్కింది. ఇక్కడ మళ్లీ పావురాలను మచ్చిక చేసుకోవడం మొదలుపెట్టారు. 2016 వరకు ఆయన వద్ద వివిధ రకాల రేస్‌ పావురాలు ఉండేవి. బుక్కాసింగ్‌ మరణించిన తర్వాత ఆ బాధ్యతను ఆయన కుమారుడు టాంక్‌ శ్యామ్‌ సింగ్, మనవలు హర్‌దీప్‌ సింగ్‌, రాజ్‌దీప్‌ సింగ్‌ తీసుకున్నారు. పావురాలను కంటికి రెప్పలా కాపాడుతూ వాటికి శిక్షణ అందిస్తున్నారు.వీటిని హొమింగ్‌ జాతికి చెందిన రేస్‌ పావురాలు అంటారట. బెల్జియంలో జరిగిన రేసులో 10 వేల పావురాలను వదిలితే, వాటిలో అతి తక్కువ సమయంలో గమ్యం స్థానం చేరిన పావురానికి కోట్లు పలికాయి. ఈ పావురాలను ఎక్కడ విడిచిపెట్టినా విశాఖ వచ్చేస్తాయి. పూణే, ముంబై, చెన్నై లాంటి ప్రాంతాల్లో వదిలితే.. వైజాగ్‌ వచ్చేలా శిక్షణ ఇచ్చారు. శిక్షణలో భాగంగా పావురాలను దూర ప్రాంతాలకు తీసుకెళ్లి వదులుతారు. ఇవి నివాసం ఉండే ప్రదేశానికి ఏ పావురం మొదట చేరుకుంటుందో అది గెలిచినట్లు. అలా వీటికి శిక్షణ ఇస్తారు. ఆ తర్వాత ఆ దూరాన్ని పెంచుతూ పోతారు. తొలుత వీటికి 9 కిలోమీటర్లు.. ఆ తర్వాత 50, 100 కిలోమీటర్లు ఎగిరి వచ్చేలా శిక్షణ ఇస్తారు. అలా 1500 కిలోమీటర్ల వరకు పెంచుకుంటూ పోతారు. పావురం కాలికి నంబర్‌తో కూడిన ట్యాగ్ చుడతారు. ఆ నంబర్ల ఆధారంగా వాటిని గుర్తిస్తారు. అటవీ శాఖ అనుమతి తీసుకునే రేసు నిర్వహిస్తారట.పావురాలకు ఇంతటి శిక్షణ ఇస్తున్న ఈ కుటుంబం వాటిని మాత్రం అమ్మకూడదని నిర్ణయించుకుంది. ఒక రోజు ఆర్థిక ఇబ్బందులు కారణంగా రెండు జతల పావురాలను అమ్మేశారట. రెండు నెలల తర్వాత అవి వీళ్లను వెతుక్కుంటూ తిరిగి వచ్చేశాయట. దీంతో ఇంకెప్పుడూ, ఎంత కష్టం వచ్చినా.. పావురాలను అమ్మకూడదని నిర్ణయించుకున్నారు. బుక్కాసింగ్‌కు ఆయనకు స్నేహితుడైన చక్రవర్తి 2010లో బెల్జియం నుంచి 3 లక్షల రూపాయలు వెచ్చించి కొనుగోలు చేసిన ఓ రేసు పావురాన్ని బహుమతిగా ఇచ్చారట. వాటి సంతానం తమ వద్ద ఉందని సింగ్‌ కుటుంబ సభ్యులు చెబుతున్నారు. వీటికి ఉన్న ప్రత్యేక శక్తి మిగతా పావురాళ్లకు ఉండదని అంటున్నారు. బుక్కాసింగ్ ఉన్నప్పుడు వివిధ రాష్ట్రాల్లో జరిగే పావురాల పోటీల్లో పాల్గొనేవారు.రేసులో దూకాయంటే ఈ పావురాలు ఆహారం కూడా తీసుకోవట. కేవలం మంచి నీళ్లు మాత్రం తాగి వేగంగా గమ్యస్థానం చేరుకుంటాయి. హొమింగ్‌ రేస్‌ పావురాలు 600 కిలో మీటర్ల దూరాన్ని 7 గంటల్లో చేరుకుంటాయి. శ్యామ్ సింగ్ కుటుంబ సభ్యులు 20 నుంచి 24 రకాల ధాన్యాలు, పప్పులతో తయారు చేసిన ఆల్‌ మిక్చర్‌ ఆహారాన్ని వీటికి అందిస్తారు. వాతావరణ మార్పులకు అనుగుణంగా ఇవి కూడా అప్పుడప్పుడు మారుతాయి. ఆహారం తీసుకున్న తర్వాత కొన్ని గంటల పాటు కొండలు, కోనలు చుట్టొస్తాయి. మధ్యాహ్నం ఇంటికి చేరుకొని కాసిన్ని నీళ్లు తాగి విశ్రాంతి తీసుకుంటాయట. మళ్లీ సాయంత్రం ఆహారం తీసుకొని కాలక్షేపం చేసి వస్తాయట. వీళ్లకు ఎన్ని ఇబ్బందులు వచ్చినా పావురాలకు ఏ లోటు లేకుండా చూసుకుంటున్నారు. శ్యామ్ సింగ్ కుమారులకు ఇవే బెస్ట్ ఫ్రెండ్స్.‘మిర్రర్ టెస్ట్’లో పాసైన అతి తక్కువ పక్షి జాతుల్లో ఇవొకటి. అంటే ఇవి వాటిని అవి గుర్తు పడతాయి. అంతేకాదు.. ప్రపంచంలోని వివిధ భాషల వర్ణమాలలోని ప్రతి అక్షరాన్నీ గుర్తించగలిగే నైపుణ్యం వీటికి ఉంది. ఫోటోల మధ్య తేడాని గుర్తించగలవు. ఒకే ఫోటోలో ఉన్న విభిన్న వ్యక్తులను గుర్తించగలవు. పావురాలు చాలా విలక్షణమైన జీవులు. ఏ పోటీలో నైనా ఇవి విజేతలుగా నిలుస్తాయట. ఈ పావురం ఒకటి బెల్జియంలో రూ.14 కోట్ల రూపాయల ధర పలికిందట. చైనా వాళ్లు మరో పావురాన్ని రూ.10 కోట్లు పెట్టి కొనుగోలు చేశారట. పావురాలకు ఇంత ధరుందా అని ఆశ్చర్యపోవచ్చు.

Leave a Reply

Your email address will not be published.

Back to top button
error: Content is protected !!
%d bloggers like this: