National

కాకరేపుతున్న కాంగ్రెస్‌ పార్టీ అధ్యక్ష ఎన్నికలు – సోనియాకు రెబల్స్ బెడద !?

కాకరేపుతున్న కాంగ్రెస్‌ పార్టీ అధ్యక్ష ఎన్నికలు – సోనియాకు రెబల్స్ బెడద !?

క్యాపిటల్ వాయిస్, జాతీయం :- సుదీర్ఘకాలం పాటు దేశాన్ని పాలించిన కాంగ్రెస్ పార్టీ ప్రతిష్ఠ క్రమంగా మసకబారుతోంది. 2014 నుంచి జరుగుతున్న ప్రతి ఎన్నికల్లోనూ ఆ పార్టీ ఓటమినే మూటగట్టుకుంటోంది. పార్టీని నడిపించే సమర్ధ నాయకత్వం లేక నానా అగచాట్లు పడుతోంది. 2017లో అధ్యక్ష బాధ్యతలు చేపట్టిన రాహుల్ గాంధీ.. 2019 ఎన్నికల్లో పరాజయానికి బాధ్యత వహిస్తూ పదవి నుంచి తప్పుకున్నారు. ఈ నేపథ్యంలో మరోసారి సోనియా గాంధీనే తాత్కాలికంగా పార్టీ పగ్గాలను భుజానకెత్తుకుని కాంగ్రెస్‌ను నడిపిస్తున్నారు.త్వరలో జరగనున్న పార్టీ అధ్యక్ష ఎన్నికలు కాంగ్రెస్‌లో కాకరేపుతున్నాయి. ఇప్పటికే ఎన్నికల షెడ్యూల్‌ను వెలువడగా.. సెప్టెంబర్ 22న నోటిఫికేషన్ జారీ చేసి, అక్టోబర్ 17న ఓటింగ్ నిర్వహిస్తారు. ఈ నేపథ్యంలో అధ్యక్ష ఎన్నికల్లో ఓటు వేసే వారి జాబితాను వెల్లడించాలని కాంగ్రెస్ పార్టీకి చెందిన ముగ్గురు ఎంపీలు డిమాండ్ చేశారు. అయితే కాంగ్రెస్ అధిష్ఠానం మాత్రం వారి డిమాండ్‌ను తోసిపుచ్చింది. ఆదివారం జరిగిన సీడబ్ల్యూసీ సమావేశంలో అసమ్మతి వర్గం గా పేరుపొందిన జీ-23 నేత ఆనంద్ శర్మ ఈ ప్రతిపాదనను తొలిసారిగా తెరపైకి తెచ్చారు. తాజాగా ముగ్గురు ఎంపీలు ఆయనకు వంత పాడుతూ ఓటర్ల జాబితా బహిర్గతం చేయాల్సిందేనంటూ డిమాండ్ చేశారు.స్వేచ్ఛాయుత, పారదర్శక ఎన్నికల కోసం ఓటర్ల జాబితాను వెల్లడించాల్సిందేనని ఆనంద్‌పూర్ సాహెబ్ ఎంపీ మనీశ్ తివారీ పట్టుబట్టారు. ‘‘బహిరంగంగా అందుబాటులో ఉండే ఓటర్ల జాబితా లేకుండా నిష్పక్షపాతంగా, స్వేచ్ఛగా ఎన్నికలు ఎలా జరుగుతాయి. న్యాయమైన, స్వేచ్ఛా ప్రక్రియ సారాంశం ఓటర్ల పేరు, చిరునామాలు.. ఓటర్లు ఎవరో తెలుసుకోవడానికి దేశంలోని ప్రతీ పీసీసీ కార్యాలయానికి ఎందుకు వెళ్లాలి’’ అని ట్వీట్ చేశారు.ఈ ట్వీట్‌కు శశిథరూర్, చిదంబరం తనయుడు కార్తీ చిదంబరం ఆయనతో గొంతుకలిపారు. అయితే, ఈ డిమాండ్‌ను ఎట్టిపరిస్థితుల్లోనూ అంగీకరించేది లేదని కాంగ్రెస్ అధినాయకత్వం స్పష్టం చేసింది. గతంలో ఎప్పుడూ ఇలాంటి విధానాలు లేవని, పాత పద్ధతిలోనే ముందుకెళతామని స్పష్టం చేసింది.తాజాగా, ఈ అంశంపై అఖిల భారత కాంగ్రెస్ పార్టీ కేంద్రీయ ఎన్నికల వ్యవస్థ చైర్మన్ మధుసూదన్ మిస్త్రీ స్పందించారు. పీసీసీ ఓటర్ల జాబితాను రాష్ట్రాల ప్రధాన కార్యాలయాలకు పంపుతామని, ఏకీకృత జాబితాలను అధ్యక్ష ఎన్నికల్లో పోటీచేసే అభ్యర్థులకు అందజేయడం జరుగుతుందని వివరించారు.ఈ డిమాండ్‌పై ఏఐసీసీ ప్రధాన కార్యదర్శి కేసీ వేణుగోపాల్ స్పందిస్తూ.. ఇది పార్టీలో అంతర్గతంగా జరుగుతున్న వ్యవహారం అని, జాబితాలను అందరూ చూడ్డానికి ఇదేమీ పబ్లిక్ వ్యవహారం కాదని పేర్కొన్నారు. మునుపెన్నడూ ఇలాంటి విధానాలు పాటించలేదని, ఇప్పటివరకు ఎలాంటి విధానాలు అమల్లో ఉన్నాయో వాటినే అనుసరిస్తామని స్పష్టం చేశారు.

Related Articles

Leave a Reply

Your email address will not be published.

Back to top button
error: Content is protected !!